MANGSA NGERTIA
Rini T Puspo
Majalah Panjebar semangat
No 24 16 Juni 2007

Ditangisana mangsa weruha
dioyak mangsa ngertia
ora bakal mandheg tumoleh
saderma miling tembung warisan

ora kleru, ngetut lakune jaman
mbujung impen lan kekarepan
awit jantraning ngaurip
manut obah osiking kahanan

pitakonku:
nganti kapan anggonmu lumayu?
nganti ancik-ancik menara gadhing?

ngemut legine gula
eman nglepeh yen manis dirasa

aja dadi pepalang tembung kang karungu
terus, terusa jumangkah
mapag esem guyu
wanti-wanti welingku: keduwung tibane mburi